Археологичид XIII зуунд монголчуудын Европ руу хийсэн түрэмгийллийн золиос болсон байж болзошгүй гурван хүний араг ясыг Польшид дундад зууны үед цайз байсан газраас олжээ.
Яснууд Люблин мужийн Чермно тосгоны ойролцоох уулархаг цайзын үлдэгдэл бүхий археологийн дурсгалт газарт малтлага хийх үеэр олдсон талаар Польшийн Шинжлэх ухааны төвөөс мэдээлжээ. Уулын цайз нь Дундад зууны эхэн үед Европын энэ бүс нутгийн хамгийн том славянчуудын бэхлэгдсэн суурин газруудын нэг болох Червиений (Червен) гол барилга байгууламж байв. Монголын эзэнт гүрэн 1240-1241 онд Польш руу довтолж, Европын армийн холбоог бут ниргэх үед уг цайзыг устгасан байх магадлалтай гэж судлаачид үзэж байна.
Польшийн Ржешовын Их Сургуулийн Марчин Волошын ахалсан судалгааны төсөл нь цайзын насыг тодорхойлоход онцгой анхаарал хандуулж байгаа аж. Археологичид гурван хүний араг ясыг олж илрүүлсэн бөгөөд тэдний байрлалаас харахад тэд дайны түрэмгийлэлд өртсөн байх магадлалтай гэж судлаачид үзэж байна. Таамаглал хараахан батлагдаагүй байгаа ч монголчуудын түрэмгийллийн үеэр тэд амиа алдсан байх магадлалтай аж.
“Зориудаар оршуулсан эсвэл булш биш байсан. Тэд монголчуудын түрэмгийллийн золиос болсон” гэж Люблин дахь Мария Кюри-Склодовскийн их сургуулийн судлаач Томаш Жиенковски Польш дахь “Science” сэтгүүлд ярьжээ. Археологичид Украины хилийн ойролцоох Польшийн зүүн хэсэгт малтлага хийх үеэр барааны өмчлөлийн тэмдэг болох хар тугалга бүхий цуврал лац олжээ. “Энэ нь тус бэхлэлт нь цэргийн бааз төдийгүй худалдааны чухал төв байсныг нотолж байна” гэж Жиенковски ярьжээ.